..موبايلي برودباند.. واي ماكس.. بيانات ..... تعددت الأسماء والخدمه واحده

وش الفرق بين الدي اس ال وبين الواي ماكس اللي بتؤول عليه ؟

طيب وش يحتاج هالواي ماكس ؟

طيب لازم شريحه أو خط تلفون زي الدي اس ال ؟

طيب كم سرعة التحميل ؟ <== هذا اللي هامكم

طيب السؤال المهم بكم هي به هالخدمه ؟؟

طيب وطيب وطيب،، أسئله كثيرة أنا سألتها نفسي قبلكم يعني مالها داعي تحرج نفسك وتسأل هالاسئله مره ثانيه عقب هالموضوع ان شاء الله

بالبداية، ماقصرت الاتصالات وفرت لنا DSL قبل يمكن 4 سنوات أو 3 سنوات ونص، كانت نقله نوعيه من الدايل أب الى دي اس ال 256 ك ب/ث .. كان شي كبير التصفح والتحميل

فررق شاسع.. ومع الوقت رفعنا السرعه الى 512،، ولا نقدر نزيدها "حسب كلام الشركة" مع العلم ان السرعه الاصليه هي 488 (يعني ماوصلت 512)

مشينا امورنا مرات تنقطع الخدمة كم ساعه وترجع، يعني جداً عادي باليوم الواحد تنقطع 5 مرات وتشبك، وشغلتنا صارت طف المودم وشغله من جديد

لين سمعنا عن شركة بيانات.. استفسرت عنها لكن للأسف ماكانت تدعم الحي اللي ساكن فيه كامل، مع ان خريطة موقعهم كانت تدعم

(حاطين خريطه بموقعهم تشيك اذا تدعم بيتك ولالا عن طريق موقع قوقل ايرث علشان يفيدونك اذا منطقتك مغطاه بالخدمه ولالا، عكس الاتصالات اللي نظامهم ادفع ونشوف وش يصير عليك)

وهذي صورة لتغطية مدينة الرياض

مع الوقت شركة موبايلي استحوذت على شركة بيانات بالكامل وزادت على ابراجهم وزادت التغطيه

شفت اعلانهم ورحت لأقرب فرع رئيسي (مع العلم ان الموزعين يبيعون الجهاز لكن ماكان متوفر عندهم بس اني عجل خخخخخخ) واشتركت معهم
نجي للأهم،،
وشو هالواي ماكس ؟

- الجهاز ياساده ياكرام فكرته بسيطه جداً.. كل ماتحتاجه عزيزي القارئ / عزيزتي القارئه هو فيش كهرب 110 أو 220 فقط حتى تشبك الجهاز (المودم) فيه، جهاز فقط بدون تمديدات زي الاناتل الخارجيه ولا شي

- مايحتاج خط تلفون ولا شريحة اتصال مثل الكونكت،، هو جهاز يستقبل موجات الاتصال من ابراج خاصه تدعم خدمة الواي ماكس بالمنطقه ،،

(وهذي صورة برج الواي ماكس (مالها دخل بابراج الجوال لموبايلي

مشكلته الوحيده ان المودم تشبك النت عن طريقه كيبل (يعني مايرسل وايرليس)، وهذي مشكلته بسيطه تقدر تشبكه على أي مودم أو مقوي ارسال وتستخدمه واير ليس عادي

يعني باختصار شديد، فكرته نفس فكرة أنتل التلفزيون بالضبط، تثبته بمكان حتى يستقبل البث،، اللهم التلفزيون تقدر تشبك علاقة ملابس وهذا لا


السرعات & التحميل

السرعات طبعاً عندهم سرعة وحده، 2 ميقابايت.. (طبعاً هم يقولون يدعم حتى 2 ميقا بايت اذا منطقتك ماتدعم أبراج احتمال كبير تنقص، لكن مهيب صايره أقل من سرعة 512 حقت الاتصالات )

والشي اللي مايعرفونه اغلبهم انه كل ماكنت قريب للبرج كل ماكان اتصالك اسرع، ويدعم سرعة اكثر من 2 ميقا ..

طبعاً التحميل يختلف للي مكانه قريب للبرج والبعيد،، يعني القريب حسب تجربة كذا واحد من الاصدقاء يوصل التحميل عنده معدل سرعة التحميل350 وفيه اكثر لكن الغالبيه أقل

بالنسبة لي التغطيه مهيب مره يعني يوصل برجين الى ثلاث، ومتوسط سرعة التحميل عندي 100 (كنت متوقع أفضل من كذا، ومع ذلك افضل بكثير من الاتصالات) واحيان يصير التحميل جداً حلو يوصل 250 زي هالصوره وتورنت

المره الثانيه قلت ابي اجرب أحمل من رابط مباشر وبدون برامج استكمال التحميل وماشاء الله خلص بدون أي فصله

ويلاحظ سرعة التحميل 100 اتوقع البطء سببه سيرفر التحميل عليه ضغط


الاسعار

الشهر/ رسوم التشغيل (مجاناً) ،، رسوم المودم (تدفع لمره واحده) = 200 ريال، رسوم الاشتراك= 300 ريال المجموع/500 ريال (التجديد الشهري بـ 200 ريال ولاحظوا انها لخدمة 2 ميقا يعني تعادل قيمة اشتراك DSL بسرعة 512)


ثلاثة شهور/ رسوم التشغيل مجاناً ، رسوم المودم 100 (اقل من الشهر)،، 850 .. المجموع= 950 ريال

الست شهور راح تلغى قيمة المودم ورسوم التأسيس، والاجمالي راح يكون 1600 ريال

بعضكم يقول لالا غالين ماغالين،، اقول انتم الغالين وهاتوا الآله الحاسبه نحسبها بحسبه بسيطه

كمشترك جديد بعالم الدي اس ال يبغى لك: تأسيس الدي اس ال+ مودم+ اشتراك شهري+ بطاقة اشتراك اول نت وغيرهم..
رسوم تأسيس 300 ريال تدفع لأول مره
رسم اشتراك 2 ميقا بايت بالاتصالات السعوديه الموقره لشهر واحد هو 180 ريال
البطاقة 280 ريال (سعودي نت أو 305 لأول نت) للشهر
المودم 200 ريال (يبيعونه الاتصالات بـ 220 ريال) تدفع لأول مره
يعني المجموع 1000 ريال تقريباً .. وموبايلي 500ريال للاشتراك الشهري لسرعة 2 ميقا..
(بحسبه سريعه اشتراك 1 ميقا للدي اس ال الشهر بـ 270 ريال تقريباً بينما برودباند 300 ريال)
نجي لواي ماكس حق الاتصالات السعوديه،، سعر الـ 2 ميقا بايت 785 ريال (بالاضافة الى 300 ريال رسوم تأسيس يعني 1085)


وفيه شركات اخرى تقدم الواي ماكس غير موبايلي اللي هي

شركة اتحاد عذيب للاتصالات " مقدم خدمة الهاتف الثابت الثاني بالمملكة "

وشركة الاتصالات المتكاملة واسم الخدمة عندهم زووووم..


النتيجه/

موبايلي= أرخص
+
ماتحتاج خط تلفون
+
مودم تقدر تشيله لأي مكان برا البيت، بالاستراحه، بالمزرعه بيت خالتك بيت عمتك حتى تقدر بالسياره تشتغل عليه لو معك محول كهرب، لكن الاتصالات بدري عليهم ..




رأيي المتواضع للخدمة:

كخدمه منافسه للدي اس ال.. أشوف انها جداً مريحه.. من اشتركت يمكن لي شهر الحين ما انقطعت الا مرتين، مره لمده 10 ثواني ومره 25 دقيقه وكان فيه صيانه على الأبراج حسب كلامهم

أرتحت كثييير من الدي اس ال ومشاكل الاتصالات والتقطيع ومشاكل مزودين الخدمه والصيانات

السرعه اعلى بكثير من الدي اس ال وثابته تقريباً مهوب زي الدي اس ال يجي يوم اردى من الدايل أب ويوم سرعتك الاصليه

تجربتي حتى الآن ممتازه صراحه للخدمه وريحتنا ولا شفنا اي مشكله الحمد لله وعسى الله يتمم ويزيدون التوسعه وتزيد الابراج عندنا




بالنهاية، الغرض من كتابتي لهالموضوع هو تفتيح عيون الناس وأبي لهم الخير، وإحقاقاً للحق لموبايلي بعد ما اشتركت معهم، ومن باب الدال على الخير كفاعله نصحتكم فيه الفترة الحاليه

من منتدي الاقلاع